Sut mae’r gwasanaeth yn gweithio

Mae ein Prosiect Rhyddid yn wasanaeth maethu cŵn arbenigol i rai sy’n ffoi rhag cam-drin domestig. Yn anffodus, mae cam-drin domestig yn eithriadol o gyffredin, ac mae ymchwil wedi dangos cysylltiad cryf rhwng cam-drin domestig a cham-drin anifeiliaid.

Ni fydd llawer o bobl sy’n ffoi rhag cam-drin domestig yn fodlon gadael eu cartref cyn y byddant yn gwybod y bydd gan eu ci rywle diogel i fyw. Rydym yma i helpu.

Rydym yn darparu gofal i gŵn am tua 6-9 mis yng nghartrefi ein gofalwyr maeth ymroddedig, Ers agor ein drysau yn 2004, rydym wedi maethu miloedd o gŵn ac mae gennym lawer o storïau am lwyddiant a diweddglo hapus i’w rhannu.

Mae’r prosiect yn cael ei redeg gan dîm o staff profiadol a chefnogol, sydd i gyd yn fenywod. Byddwn yn defnyddio ein harbenigedd i’ch paru chi â’r ci maeth perffaith a byddwn yn cynnig help drwy gydol eu harhosiad â chi.

Oherwydd natur ein gwaith, mae cyfrinachedd yn arbennig o bwysig i ni. Bydd cŵn bob amser yn cael eu maethu mewn ardal sy’n ddigon pell i ffwrdd o ble roeddent yn byw. Byddwn yn cadw mewn cysylltiad â theulu eich ci maeth i adael iddynt wybod sut mae eu ci’n setlo, gan gynnwys anfon lluniau atynt er mwyn iddynt wybod bod eu ffrind pennaf mewn dwylo diogel.

Nod ein Prosiect Rhyddid yw aduno cŵn â’u teuluoedd. Pan ddaw’r amser, byddwn yn rhoi gwybod i chi a byddwn yn gofalu am yr holl drefniadau. Mae’n anorfod y byddwch yn magu perthynas agos â’ch ci maeth ac yn drist pan ddaw’n amser iddo adael. Ond gallwch gysuro’ch hun drwy wybod eich bod wedi chwarae rhan allweddol mewn helpu teulu a’u ci i ddod o hyd i le diogel, sy’n rhywbeth y byddant yn hynod ddiolchgar amdano.